"dai nang payalbug"

parnasu, parnasu, parnasu, parnasu,
o’t maklak ne yata ing katni mu tronu?
e ne miyuyunyat punta ing pluma mu,
kareng waring musa e ne inspiradu?

misan ing kilabut, kanaku linukub
mabilug katawan, bitis angga buntuk,
king amanung dindam ding adwang balugbug,
ding poeta kanu, “dai nong payalbug.”

detang atin tyaga king pamamalangkas
karing kawatasang makirima’t sukad
pablasang dit no mu karing talasulat
anti ring babasang kalupa rang ditak.

-30-

*** gewa ke pu ining poesiang ini agpang king midalakit a istorya kanaku, iti ya itang inyang manyawad lang saup king metung a meyor ding atlung laureadung poeta ban apatindayag de king kapamilatan na ning radyu ing amanung sisuan, at tengwanan na la ning alkalde a nganang mekibat, "ayasahan yu kung sumaup uling balu ku poets are the vanishing breed." (mas o menus ita pu ing atatandanan ku king istorya.)

"ing alkansya ku"

king panaun ngeni e na kanu usu
ing misunis rima't mibalangkas bersu,
nung mamoesya ka king sisuang amanu
lalu ra kang kalyan uling "baduy" kanu.

dapot nung ding mayli reng pakirandaman,
pelalung ing lub mu akwa nang tumabang,
ing pangasalaing ning amanung sisuan
-pota king pusu mu mapda ya munaman.

inya balayun ku.... -e baling mayli la....
pablasang balu kung *karening lalala,
ding bokabularyu mengari lang barya
a kakung sisinup king kakung **alkansya.
-30-

"ing tau king babo bubungan"

makatalungku ya king babo bubungan
kabang pagmasdan ne ing banwa king lalam,
atyu ya ing aldo dapot e mitiman
uling sasalabat ing maympis a lulam.

kabukas ing dimla, keya e petudtud,
ala yang kakawul nun'e ring keyang tud,
kabang pilit arwan ing magsalbat nang lub,
e na ayagwanta ing singut na't siguk...

pinandit ding biga menangis la keya,
"magkunwari la mung makirame," ngana,
"inya mibabad la ring adwa kung mata,
ring kakung mi-inda, uling kinwa ra la."

-30-

"ding talasulat kapampangan"

karing talasulat dakal nong tinuknang
pauli ning e re (kanu) panakitan
dagdag pa ing sangkan a makayambalang
-dit na lang mamasang obrang kapampangan.

karing talasulat, metung kung maintang
dapot metung bage ing pakitagalan
-makasuyung gambul king amanung sisuan
andyang rugung dimut ing kakung kagiwan.

king pamanyulat ku gagastus ku naman
sumangid ning tutung e ku manakitan
dapot makanyan man, ita, e sumbagal
uli ning lugud ku king amanung sisuan.

-30-

"pangakung e matda"

karing kakung mata musa kung diwata
anti kang sampaga kaku babie tula
mawiwili keka, buburan mu ku mua,
lulualas ku banua, dirinan mung sala,

gagayuman mu ku king timan mu’t lagu
anti kung debotu, matula ku salu,
king kekang amanu malambut ku pusu
king balang buri mu basta mutus ka mu

Arcie, musa daka ika alang al’wa,
migit ka karela, keka makaatna,
panandaman keka, ing lugud kung misna
anggang alan’angga pangakung e matda
-30-

*ini ing minuna kung diling gewang malikwatas,
e ku la pa masyadung balu tyuntyunan
ding malikwatas inyang gawan ke ini
dapot malyari yang panyagsagan
ing poesya kung ini a kalupa ring tune malikwatas.

"anting heyroglipu"

ngakung magsalita, "ding sa'ng pusu tamu
matibe la't masyas anti waring batu,"
-e ku buring sabyan karing sablang tau
ing ala tamung lunus, lugud at respetu.

nun'e pin king s'yas na, ing amanung sisuan
anting *heyroglipu mirukit malalam
ban ding panaun man milabas la't datang,
karing pusu tamu magin yang lambayan.

tumibe ta pusu king uli ning lugud
anting batung mabye masakit adurug
e anti king balas, panyatang ning albug
ing pangasulat na mabura king agus.

-30-

"abaniko"

ding bulung panaun dakal nong melagas,
detang bage kan'ta kayagnang kinupas,
dakal karing gamit -bage nong milabas,
uling ding melakwan -museu la miras.

karing dating gamit atin angga ngeni,
-atin abaniko, mupin medyu simpli,
kanitang minuna gamit lang babai,
ngeni gagamit na pelalung lalaki.

mengari yang payung malati ya't mayan,
'dyang nu ka man ume malyari meng dalan,
iti malapad ya nung ladlad mu neman,
agyu nang ilako ing kekang lisangan.

-30-

"ding atlung maria"

i aring Solomon* a metung poeta,
ing keyang sarili suging lalawen na
dapot nung balu mu ing keyang istorya
mekad ‘yan mang pluma e patalan keya:

atin yang atupan malagung dalaga
a anting mengising king kelabwaran na
inya ginamit na ing panga-makata
-gunulis yang dusing king lagyung poeta;

ding pang’intungulan ding murang sampaga
anti waring punlas, igtal na karela,
ing kesapakat na ing hardineru ra
king danyus perwisyung tinape’t poesia.

-30-

"salitang baryu"

"pibekut-bekutku,” nganing king karapan,
tuneng kapampangang malagad damdaman,
‘nya mipatiman ku at agad keng kitnan
itang migsalita nu’ ya makatuknang.

nginisngis yang bagya sumangid ning ayli,
“karin ku king Porac, eku taga-keti.
-inya kitnan mu ku king uli na wari
ning salitang-baryu a kakung sinabi?”

king keyang pekibat mipda ing timan ku
ing kapanamdaman tindus ning amanu
-buri waring sabyan ing amanu tamu
amanu ra nemu retang taga-baryu?
-30-

"bananaque"

metung "bananaque" makilasu akbak,
lasu a pinulut king dalan ning anak,
dalan nu ring lasu dakal menganakbag,
lasu ban ing keyang regalu e payak,

regalung binye na king kalugurang 'ma,
imang maglabada't king pagal 'ne putla,
putlang anting papil 'lamu 'laneng daya,
daya a malare anting matang maglua,

melare king gaga king tula nang sobra,
tula king regalung king anak tinggap na,
regalu ning anak king aldo nang ita
aldo ra ring indu keya maulaga.
-30-

"dangal ning talagambul"

nanung dengalan mu king ibatang indu
nung upa ing sangkan ning pamanyuyu mu?
inya andat kimut nung iti alayu
susulud king isip ing pamagretiru.

ing upang pamayad dakal ya itsura,
ing mumunang dili, syempre, yan ing pera,
ing matning palakpak metung yang aske na,
dapot ing papuri, king ere, 'tas naka.

misan ing palakpak mamunga yang yabang,
ing sobrang papuri makanyan mu naman,
kalupa ning perang agad panintunan...
-e sa' king kasuywan king amanung sisuan. -30-

"ini namu kanu kesa king kawani"

king pamagdebors'yung pilit dang pakidwang,
ding taung marawak anting panusignan,
andyang sasabyan dang e mayan tanggapan
ing tau a minye dusing king pagkeran.

"ini namu," ngara, "tungkul king lalaki
dinulap kandungan ding al'wang babai,
kuturan king lait mataktak ing suli,
king kanyo ring babi iyatya me iti..."

king babai naman a dinapat mali,
ngana ning dindam ku, "ing kunan mu seynsi,
tamban me king pugun, pabayan king pali,
-king sentru nang dake tapal meng piragli!"
-30-

"ing talagambul"

tara gambulan te ing amanung sisuan
ing pangambul tamu bersung kawatasan
at ding panyunis ta amanung malalam,
ding bokabularyu ban lang miragdagan:

ing amanu tamung binye ning Linalang
dapat tang awunan itang makalalam
king kekatang pusu ban e mitambunan
at ban e mikutkut king pamangalingwan;

uling ing gagambul andyang king literal,
mamatsit yang gabun ketang makalalam
ban keyang ibili king makatiwangwang
ban ing sustansya na takman ding tanaman.
-30-

"mataderu"

kitnan ne'y tata na kauli na bale,
ing amanung sisuan ot keya tiru ne,
king uli na niti pane yang malumbe
uling ing bakal na pamayad neng pane.

'ta e makanano? bawal king eskwela,
ing mangapampangan neng magsalita la,
uling mamayad la bilang parusa ra
king pamangamit ra king amanung mana.

ngana megsalita ning melumbeng tatang
"ing kekong eskwela mengari yang tagnan
nung nu tatabtaban ing gulung-gulungan
a payangu king bye king amanung sisuan."

-30-

"e ra ka sikasu"

kapampangan, nu' la? nu ka kapampangan?
nu la ring anak mung tutung kaluguran,
ing kekang amanu a karelang sisuan
a mayumung 'yagkas at pakirandaman?

uli ning panaun mebating na yata
ing yumu na't sampat karing balang dila?
uli ring mapilan ngarang magsalita,
"ot e yu 'yapusan istilung banyaga?"

pantunan da keka ing obrang latinu
pelalung nyebi ra retang amer'kanu
inya neng ika na'ng mamapse amanu,
mayli lang malati, e ra ka sikasu.
-30-

"mas pasalamat ku"

e mamatba'y adan king katak nang eba,
ita ing maralas neng migaga la;
katak at makabang iki king asawa,
-kaba a kang adan misan nang pepabwa...

ngana, "king panasbuk at panugali mu,
e ka pasalamat ayasawa mu ku,
ing kekang apili nung al'wa yang tau
alang aldong e ka mabugbug saradu...

"ing kekang tengwanan nung mayan ya gamat,
nung pagpa no keka mas e ku atanggap
'nya nung balu mu mu akung pasalamat
makipanaun man a sobra ka katak."

-30-

"masyas pusu king Guinu e king tau"

ding taung matula king pamagdebors'yu
mekad king asawa e la migkaswelu,
makanyan dang imbut siran ing amanu
a sumpang pengaku king arap ning Guinu.

ing kasal bage ya a sagradung tutu
pablasang king Dios man, iti, e ya biru;
iti panaptas Ne karing adwang pusu
ban nung lawen Na la... - deti metung no mu.

inya ring matula king pamagdebors'yu,
nung king santo biblya panyalugsugan mu,
ila ring amanuang masyas pusung tau
e king parang tau... -nun'e s'yas king Guinu.

-30-

"panas"

ikit keng maranun magdala yang putu,
mamwat nemang abyas inyang panga-ugtu,
pangagatpanapun, dar'la na mayumu...
-ot e ya patugut 'dyang aldo duminggu?

pisungan ke, ngaku, "ot e ka paynawa?
aku ing susunga neng akakit da ka,
king kekang atipun, 'dyang e ka magobra
e naka dumanup kilub pitung banwa."

tiniman ya kaku at nganang mekibat,
"e ku kasi agyung kabud kasat-kasat,
ing kakung atipun, nung kaku mu sapat...
-ding kakung pagsadya ring kanakung anak."
-30-

"tulang"

'tin kung akilala a maglalang* napun,
king adalanan nang tanamang talilung
memulut yang apat kasantingang bulung
karetang dilo nang mebaldug king gabun.

kauli na bale kinangwa yang lara,
pinekat kaniti ring bulung nang kinwa,
mingatbang sumangid dininan neng tidwa,
malapit king sepu, king dakeng mataba.

miglipakpak ya'yti karing keyang palad
at peytas king angin ampong sinalampyad;
kabang pag'masdan ne, ating dintang anak,
penagal re iti king darlang panyakap.
-30-

"andyang e mu na sabyan ita"

"kaluguran da ka," ngana nitang kanta,
"al'wa ing buri ku a dandaman keka,
buri kung pakit mu ing migit kanita
-kan'ta 'dyang e mu na sabyan kaku ita."

binit kung peramdam ing lugud king mal ku
king miyal'wang dapat migit king amanu;
king lambis tiktak ku't meging karinyosu,
king kapanupayan, alang tumwas kaku...

sumangid ning bageng papakit kung ita
(migit king amanung "kaluguran da ka")
buri ku pa muring ita dandaman na,
anting alingongo king peramdam keya.

-30-

"ing bibi"

ketang misan aldo ‘ting metung maintang
mipali ne pala, tinipang mirapal,
ing awla ning bibi iya ing lepitan
-bigla ing gulisak mitdas yang masikan,

ing indu king babo mibalikwas rugu,
maligwang tinipa, digsu pa menabu,
bala ninanu ya ing anak nang bunsu:
o’t ginulisak ya? -buri nang abalu…

kayakit ning indu, agad mipakayli
king mangagang anak ngana pang sinabi,
sukat imyan mu la ring sisi ning bibi
inya pin ing geindu tiktuk naka sisi!”

-30-

"talubang"

gagapang ya'ng dati't bina keng kasnukan,
ligusan ne bulung ing kakung tanaman;
liligis ku ipan maybug keng dunutan
dapot ustu kaya o dapat ing daptan?

sinawa ku keya, mekad ya munaman,
matula kung e ne pepalto misan man
-tulang misan aldo lalung misulsulan
uling menakit kung makuleng lelangan;

mig-unyat ya't ngana, "karakal ku utang,
pabustang mablas ku king al'wang paralan;
'dalakit ko lugud king lugud ding dugpan,
bayad karing kaku minampung tanaman."

-30-

"mabibina"

tumali ka't ume ayan i apu mu,
ing karelang bale amboka ya'ng baryu
samantalang iya, atyu ne king sepu
ning sinulad ning bye a binye ning Guinu.

nung e ka pa takbang pota muna ya pa
at e mu ne dasnan agyang maratun ya,
e ne makakabat ing pasbul ning banwa
king mayumung angin a tatabug keya.

uling anting mamun agyang e tatakbang,
pila ding manatad mesamas ne dalan,
diwang king katawan malubak ne talan,
-maynip neng manaya -merkuryong talubang.
-30-

"meangu-bye"

dakal ne panagtal bulung ning panaun,
migit karing buak nang maputing atipun,
ngeni nung lawen me mengari yang pungul
a bayung pangagli ning marimlang pantyun.

ding yata ning aldo kan'tang misapwak ya,
digpa la king yatu at mekipamyesta,
matulang angeles king pekabunsu ra,
mipalakpakan la at memamagkanta.

-ngening mibait ne menibat king labwad,
iya bilang angin* ban neng maglipakpak,
banwang tatalangan ding apu na't anak,
lulam na, king awun, kayagnang kinuldas.
-30-

*diwa

"dinan ta nang selyu" ( 16 )

istung matudtud ku o makagising man
lilito ku diwa anti waring misdan,
king suluk ning tundu ikang pagdulapan,
ing uyab ku waga ning kekang panyatang.

mengari ka waring alinong gagapang
malaleng mumukyat king kakung pagkeran
at kaybat magdatun king kakung ulunan,
sumulud king buntuk ban kung paninapan.

dapot ding paninap nanu la man nyaman
paninap la mu rin at alang katututwan
inya ing lugud ta'ng anggang kawakasan
iselyu king kasal ban nang e tagimpan.
-30-

"mahinhin la wari?"

ngara ring makatwa e king balat kanu
karin me atulan ing metung a libru,
-metung a kasebyan medyu panwalan ku,
dapot e ya tutu karing balang tau;

metung alimbawa, karing kababaynan,
king palda ra't 'malan akit kahinhinan
sumangid ning atin babaing mapilan
gagayak mahinhin ban e lunto samal!

ing magpaldang mini dapot nung seryan da
kabang tiktak kuyad ing mesabing palda
ing sasalikut da 'nya halus lulto na,
-mahinhin la wari ring anti karela?
-30-

"suka"

halus abak nemung minuli i Manding,
sunde-sape nemu king sobra na lasing
ing manayang indu mipatudtud nya rin
dapot king katuk na agad yang migising;

kabuklat ning pasbul mune yang manyuka
kinwa ne ning indu itang arinola
dapot ing adaklut itang kasirola,
karin ngan mibulus ing anggang liklak na...

kabuklat ning abak sasyo yang danupan
inya mengalug ya ing apung mag-ulyan,
menakit yang kanan, iti keyang gisan,
"ing tagilo," ngana, "taganang manyaman..."

-30-

"nanung asahan mu?"

ding lupang mahinhin, ngara ring aliwa,
misan kanu ila retang pakawala
papalto lang anting malinis la diwa
neng alang manakit, e la naman tula.

mengari lang asu a mag'malan tupa
papampanan da mu ing panga-asu ra
mamu lang lalawen karing kekang mata,
dapot ing katutwan manginis la pala.

nung pakirandaman, bala mu pin ustu
dapot sulsulan ke king simpling kutang ku,
"detang alang hinhin king arap ding tau,
king makasalikut nanung asahan mu?"

-30-

"tinapang tamban"

king sakit na ning bye keti babo yatu
dakal lang kalulu ring magtiis namu,
ing nasing NFA ambulan dang toyu
ban kan'ta king asbuk e malanging 'subu.

ating metung grupu ring migmisyun misan,
ding malukang anak layun dong pakanan,
mabanglu ing nasi, tinapa ing ulam...
ban la rugung takman asan danum mu man.

ing metung a anak a karelang igkat
minisding king kanang king arap na epag,
"andyang kalulu ku," ngana niting anak,
"e ku pu mamangan pritung tarebalak..."
-30-

"e la wari parehu?"

ninung migit kayap karing adwang deni;
king metung lalaki at metung babai?
mababa ya lawe keya ing lalaki
uling pamanda ya king kau neng bengi.

mura yamu singil, tsa-titlu mung dalan,
e anti ring al'wa, tsa-lima o anam,
uling ing layun na ban yang atin pakan
ketang keyang anak a bungang kamalyan.

dapot dening adwa nanung keliwan da,
nung burikak de mang awsan ining Eba
nung ing keyang sangkan uli ning lipit ya
kabang ing lalaki, ing kelabwaran na?

-30-

"ing lango at babagwa"

anti yang manakit a karning sagiwa
king langong lalabas ing metung babagwa
'nya ngana, "mekeni... at salangi ka pa,
ban mipaynawa ka king bale kung gewa;

at e ya petugut king pamangumbira
ban kan'ta ayan ne ing aging bale na
dapot ining lango anting mamusit ya,
-talastas ne layun 'nya e ya dinugpa;

king managkat keyang danupang babagwa
mekibat ya'ng lango, ngana, "e ku bisa,
akwa mu nang mate a mangayat wawa
e mu ku atakman," nganang migsalita.

-30-

"ing sumpa king kasal"

nung 'pasar deng batas ing pamagdebors'yu
at gawan deng legal karing pilipinu,
ing sumpang pangaku dapat deng ibayu
a kekatang 'yapse neng kakasal tamu;

aliwa na ing dating sumpa king Linalang,
"tatanggapan ke pu at pakaluguran
king atin at ala... sakit, kapaldanan
makapikawani ing mung kamatayan,"

ing dapat sambitlan nung mangaku tamu,
"opu, tanggapan ke bilang asawa ku
king lumbe at tula anggang agyu mi pu,
anggang mikawani uli ning debors'yu."
-30-

"ing susu at talangka"

misan matudtud ku, miglakbe ku diwa,
king pamamasyal ku miras ku keng sapa,
at atin kung dindam mangalating s'wala
-kasabi ne palang susu ing talangka:

ngana keya, "suso, obat mangilag ka?
-makikaluguran ing imbut ku keka.
obat deng aliwa tatanggapan mu la?
-keng nasa ku keka nan' waring matsura?"

"ing layun mu kaku tutu ping masampat,"
ngana king talangka ning susung mekibat,
"king kekang ugali karin ku mangilag...
-tula mung manigut king ninu mang magtas..."
-30-

"ing manugak"

aganaka ke pa ing metung istorya
ning metung a anak at ning alawa na,
katila ning uran at maralumdum pa,
mine ya marangle, karin menugak ya:

inyang damdaman nang 'ting kinet king padwas,
agad neng pinitik ing padwas ning anak,
itang makakinis miyatya yang matas
at king alawa na tegalan neng agad:

inyang salatan ne itang keyang ikwa
(uling apansin nang mabayat yang bagya)
mipagulisak ya uling aneng kaba
-ing ikwa na pala bulig yang mataba!

-30-

"pilato ya wari?"

mengari ya'ng lango a pisususmamyan
king metung a taung tiktak king kayabang,
bala na matas ya at dapat talangan
kesa king damulag a keyang pirugpan.

metung pa, ing lango insektu yang mar'nat
sasaglap yang dinat king nu ya dinalpak,
king dinat ning tau o basurang timbak,
keka manawa yang king kulkul payatyat.

anti waring ari a digpa lamesa,
king disnan nang kanan bala mu ninu 'ya,
ligisan ding bitis king babo ning grasya,
-pilato ya waring inos ding gamat na.

-30-

"anting lango"

ing metung a madre kilub ning kumbentu
menakit yang lango king labi nang basu,
bilyo ne’t tinabi uling pota kanu
magdala yang sakit ampo pang mikrobyu…

-ita mu rin lango, digpa ya king pisngi
ning krus nang tatalnang rosaryung malati,
minumang minuna, ing madre katuki,
anting penimunan king keyang pangadi.

mengari ya iti king taung marawak
at mapagkunwaring malinis ya dapat
dapot ban matudtud, ing panulung kapad
alang al’wa nun’e pamagmayap-mayap.

-30-

"e ya miglakbang"

''nyang mamanikan ya kang Eba i Adan,
ing akayarap na ining keyang tatang,
at ing dalaga na bayu perungutan,
sebulan ne'yng Adan king metung a kutang;

"ining kekeng bale a eyan mu Adan,
pakalawen me man e ya kasantingan,
bayu ka mipanik pilan lang balitang
ding kekang likbangan?" ngana nining tatang.

anting e mebigla, mekibat ya'y Adan
ngana kening tata, "ala pu metung man
pablasang balu ku reta pung maglakbang,
kaybat ning syam bulan magin la pung tatang..."

-30-

"katulid ning kabangal kung pusu" ( 18 )

kabusni ning abak potang kamulagat
anting e kuntentu king kaba paninap,
ika karing mata, ika andat kurap,
atyu ka larawan gulut ding talukap.

ing diwang maglakbe ikang panintunan
pati king marangle neng mipaparalan,
sakaling manakit sampagang tanaman,
susulud king isip ing kekang larawan.

pablasang ika mu ing kakung palsintan
ing kabud pamanda king pusung salunan,
ikang katulid na ning pusung kabangal
tegulaling kaku ning Guinung Linalang.

-30-

"pimamanan"

atin kung amana kang indung ibatan
metung yang lulanan usuk at diparan,
swala ra reng bugtung, amlat, at kasebyan,
lawiwi ning lugud king labwad kung tibwan;

ing pisan nang 'ma ku atin ya mu naman,
mupin maragul ya ing keyang lulanan
-ing keyang amana karing pipunpunan;
'nyang mikayanak ya, sildak neng masikan;

ngeni ring anak na anong kapibandyan
mupin maluka la bilang kapampangan
alang midalakit karela ditak man
king metung timpukan a amanung sisuan.

-30-

"posti"

ing dayu yu bale king kakung ibatan,
tutung malawut ya, -e mu adwang dangkal;
dakal lang pilapil ding kakung biltangan,
at dakal lang sapa ring kakung telasan...

nanu kayang sangkan obat kukutang mu
nung pilan lang posti ring adalanan ku
king pamamunta ku keti king bale yu
-mamilang ku wari angga king kekayu?

-dale... e la adwa... -e ku balu pilan,
dapot kabud metung ing kakung selangyan
uling 'nyang ing posti ning bale yu'yng disnan
dinalit ku pusu, ika ing eranan.

-30-

"ing mansanas na"

ing kanakung pusu metung yang mansanas
a kakung tatalnan karing kakung gamat,
at bayu ing sabla, king banwa ke tinas,
ing Keyang bindisyun kanakung inyawad,

kaybat, pengili ke king dakal pirasu,
dinyan ding kapatad, tata't kakung indu,
ding kamag-anak ku, ding malugud kaku,
ding kakaluguran -pati kasalang ku,

ding sabla kaybat kong laganas pendinan
mibalik ku keka, o kakung palsintan,
ining mansanas ku, uyne at tanggapan,
daraung mabilug... -e bawas bagya man.

-30-

"ing tagnan da"

makonsiderasyun, mapamakalulu,
mapanupaya ya karing sabla kanu
-king pamaglarawan atin kayang ustu,
ita ing kutang na ning duda pusu ku:

ding talapamintu ila sana dapat
detang magpatune nu' ya anti kayap,
dapot ing masakit ing karelang dapat,
king mismung lagyu na ing mangaskas dinat;

uling ding anak nang mapanutang daya
karing kapatad da, inosenti't sabla,
ban panusignan da ing sariling pita
...daraptan da kanu king keyang upaya.

-30-

"kalayan"

kalayan, kalayan, nanu ka kalayan?
nanung ulaga mu keti king ketawan?
nu' ka masasali? nukaring tindahan?
obat daya pa mu ing kalibeng adwan?

dyamanti ka waring dakal makiburi
o malan ning Balen a sari kaputi?
ing bye ring bayani galal mu la wari,
sukling kamatayan king dayang penyali?

ngeni... o kalayang karelang binayad,
binye rang timpukan para karing anak,
e ra yata balung migit ka king perlas
'nya pabustan rakang mangarnatan burak.

-30-

" i leon guerreru"

ninu para keka i Leon guerreru?
ing waring dakal na asaken kabayu?
at e me abiru e byasang manguinu
uling patasan ne, ninu mang 'yarap mu.

o itang lalaki a makasake na
king babo kabayu dapot kinuldas pa?
e ne kanu agyung papulayan, ngana,
ing metung kabayu a e naman keya;

ing keyang latiku e ne kabud-abud
king balang kabayu 'yunyat at pamarug
uling para keya dapat nemung patud
ing pamalasbas na nung utus ning lugud.

-30-

"ing alang kapanayan"

misan nanasan ne dimla ing kalayit
nitang mangkukutud king tali a maympis,
nung wari king papil mengari yang lapis,
itang markang ekis malagwang igulis;

uling ing aldo'ldo ane king kabuya
king lumbeng magpampan king gulut ning tula,
dapot matbud ya man a mengaring bula
dirinan neng tabun ing ilug na ning lwa;

dapot king api na ning keyang katawan
ala yang upayang tugtugan ne't patdan,
-nung tumyup ing angin, labul sa'ng masikan
dala ne'yng kalayit pangutud tagimpan.

-30-

"e la mu naman bisang makiwangis"

"Keka a linalang karing tau't lasip
king kayupayan Yu atin kung lalapit,
kamamalu ku man e ku magmalinis,
ing kanakung pusu lubas Yeng akakit:

"sana karing tau nung misumpa Ko man,
king wangis ubingan e Yo pu gagawan
pablasang ikami byasa keng gagalang
at e ke manuktuk kaparang ubingan."

mekibat ing Swalang magbaba king sala,
"tungkul karing tau," ngaNang megsalita,
"king Kakung larawan karin Ku la gewa...
-detang amanwan mu lasip lang mababa..."

-30-

"ing keyang inawang saldak"

king lalam ning banwa a matning durugang
karas na king sepu mamaksing masikan
bala mu sisi kung king dimla mangalgal,
mababa yang gandus ing kaku papampan.

penyumpa ku wari at litlut ing kalma
inya pin ing bye ku lubas ya king tula,
agyang gulisak ku't panyagad ing swala
bala mu pipi ku a maklak ing gaga.

nung bibi ku sanang tela talampakan,
dagul man ing danum agyu kung sulungan
dapot mengari kung metung a tanaman
king batung malangi, karin makatanam.

-30-

"ing paud na"

istorya ke keka itang kumpari ku,
ing pamanuli na neng aldo sabadu:
anti yang burarul king ere laladu,
keta king karela, miraras ya'ng saktu,

at kamulagat na kayapsa ning bukas,
ing keyang sentidu anti yang masaspak,
e re akasabi, bulyo ya pakibat,
angga king lambis da ring adwa nang anak...

ita ing paud na ning keyang asawa
pwera itang bengi king pamanyuka na,
at pwera pa ita king pamibabata
-kabukas neng siping mabangnas inawa.

-30-

"ubingang menampun"

karing matwang aldo iya ing menampun
(anti yang pengari king tune nang pungul)
karing bayung sibul a sibilisasyun,
anggang meragul lang anting matas dutung.

anti yang ubingan libutad marangle,
keya la sususu ding lelangan lele;
ing urang masikan, keya pasanting bye
dapot neng kaneldo manganib yang mate.

dapot ngening aldo al'wa na ing banwa
itang mangkukutud king kapaldanan na
nun'e den nang tau king kelan ingat da
king pamanugse rang mali king basura.
-30-

"ing piping megtapat lugud"

king metung nang gamat dapot e king kayli,
lidlad na lang misan ding atlung taliri,
itang tindiragul, panuru't malati,
'tsaka ne inarap ketang keyang buri;

kabang makatiman ing makaltong palad
ding adwang taliri serya nong e lidlad,
ding kuku mata lang lalon ing kayarap
dapot ing pagduglan e man mu binulad;

nganing makigamat a mebalag tula,
maklak man e baug ing kanakung s'wala
nung ing amanu ku keyang dindam mu sa
"kaluguran da ka" ing buring pawaga

-30-