"yumu king kapalas"

ing kyak na't gulisak mamyus king kasakit,
deyg ne pa ing anak, titi king tayiktik,
bista man batu ya't makapal ing dalig
dadalakit murin, swala king sumangid.

kalabas ning oras mikakapayapan,
ikwa nang peynawa ing kyak nang masikan,
at nung akit me mu, ane king kapagal,
mandilu yang pawas dapot makatiman,

minatna ya't ngana, "salamat Kekayu
king pamagkasakit a akabyusan ku,
sumangid ning kaplas tikman ku ing yumu
king malating swala ning kalam Yu kaku.
-30-

"bini ning amanung sisuan"

kabang lalakad ku ‘tin kung atisuran
inyang lawen ku la butul lang kasakmal…
-mebaldug la ibat ketang miparalan,
ban isubli ku la agad keng tegalan.

inyang balik ku la tiniman ya kaku,
nganang migsalita, “keka na la itu,
pulutan mu la ngan ding anggang akit mu
uling bini no ren ning sisuang amanu.

“itanam mu la ren ampong parakalan,
at datang ing aldo ban kekang pupulan,
karing aldong deta mamalag ka naman
ban ding katuki mu atin lang pulutan…”
-30-

"para karing alang masabal"

ing kule ring bulung kinupas mabilis

karing kalindaryung makasabit dalig,
detang apu king tud, ding karelang bitis
king marimlang kulkul tatakbang malapit;

ding apu ra king tud detang apu king tud,
king pamagaral da, king museu linub,
misdan lang menakit karing libru kilub
-banyaga la sulat 'gyang hawig tagalug;

mengutang ya'yng metung, "anong wika yan ma'am?
may tao parin ba na gumagamit n'yan?"
"konti," nganing mestra, "yan ang kapampangan...
darating ang araw history nalang yan!"
-30-

"ing pakisabi na king anak na"

karungut mu ngeni ing grasyang makapag,
ing oras ning pyalung nandin pa milabas,
ing kakung kutsara sikaswan me anak
-uling nandin ku pa mamitang kasilyas...

datang ing paanaun maging anak mu ku,
masakit subwanan, arwan kalupa mu,
e ka sana kan'ta manyaldak amanu
'gyang ing pasensya megisan ne kaku.

makanyan man anak, ali ku pamitan
takman mu kanaku ining daralanan;
matbud ka pa ngening dapat alalayan
-aran naku kan'tang alang pakinabang.
-30-

"king panyatang na keya"

malagu ya'yng yatu at makayama ya,
mayumung sangapan ing keyang inawa,
e mu na pagtakan kenu ra amana
ing tagle rang legwan ding Ebang anak na.

dati ring mata ku dakal la aptangan
karing mekamana king sakdal nang legwan,
dapot biglang-bigla, anting miyalilan
-limbug karing Eba iting pimamanan...

ngeni nanan ku man maglalaweng pilit
karetang anak na ala nakung akit
-ing kekang larawan, king mata ing bilig
-karelang migmana, uling ikang migit.
-30-

"agyang pasamsam na la"

ating mipalsintang miparalan misan
nu ring patipati manaya lang uran,
at makaduku yang titiman i Adan
uling e man matna balu na'yng larawan...

at nganang memiru kang Adan ning Eba,
"ot e ka mo matna..? sige mili naka...
e naka marine... -bisa ku mo...!" ngana,
kabang gulis-gulis ing timan lupa na...

"mamusung ka't ali," ngana keyang Adan,
"panupaya mu ku e ra ka tangwanan.
'gyang yatya mong matas ban kaku pasamsam,
-mangalabug lamu uling e ko sapwan!"
-30-

"e ya Eba legwan"

kalagu na yatang atsi king karapan,
lalakad mumuna kayabe nang koyang
uling deng lalaki a asasaganan
mangapalipit la at mangaba batal...

king bilis ku takbang ikwa kung miyuna
kaybat belikdan ke ban lawen ke sana;
lakad na't katawan anting ding rarampa,
masanting ya 'malan, makatuki moda...

tutu, malagu ya magumpisa lalam,
sana ing kara na makanyan munaman;
anti kung maniglo dapot megin misdan
pablasang Eba yang maki-legwan Adan.
-30-

"dangal keya ing dangal na"

ngana, "nung ing mal ku, king buri nang gayak,

detang Magdalena, king mata, ring saslag,"

ngana, "ing kanwan ku, makananu keng tas

nung ing lupa ku anti neng dekurak?

"king aske nang ita, neng lumwal ya bale

nung buri nang aku ing keya mantabe,

bayu ke tangwanan, mas misdingan ku ne,

maging sukad na man ning pamihiwale...

"pota reng manakit misip la kekami

a parokyanu ku karing patipati...

-pablasang ing tutu," ngana king sarili,

"agyang karing libri masalpak kung mayli..."
-30-

"goma"

pamitan ku keka kakung kaluguran,
keka a bini na ning kakung balakang,
ing tabsing ning dalum e mu sa' tatakman
-e anti king tasa a kakung pinuman;

ing tula at grasyang kaku mipagkaymut,
karing kekang palad, sana mipagkalub,
ing manese keka al'wa sa' ing lungkut
ban e ka mamuli king kanakung katbud;

bagus anti ku mu king metung a goma,
malyaring igutan angga king agyu na,
migit king agyu na, nung igutan me pa
misan ya mapatlud 'gyang elastiku ya.

"anti ya mung entabladu"

ay! pangalagu ra at makapangasdan
ding Eba a maglwal king pasbul pisamban,
magumpisa buntuk angga talampakan
ala kang iyugse, kakabiran la ngan...

ala na ing dating singkakaba palda,
dela ra nang Hapon ing pormal pustura,
pelalung ding takde memaglage na la,
-tiki ra king usu pati pamanyimba...

ing pilalakaran ding adwang kakasal
papunta king arap ning altar pisamban,
ding aliwang Eba mekad ing isipan
entabladu ya mung anting pirarampan...

"ing isipan na"

misan managumpe ing kakung sukal lub
uling king kabyayan parati kung dimut...
-map la pa ring marok, ing bye ra e maskup
inya king dase ra e la mamaluktut.

misan mangutang ku, ot ila ring swerti,
ila reng malwalas at dakal panyali,
akung panatilyan ing malan maputi,
neng misan ala kung isubu a nasi?

-dapot isipan ku, ding salingku daklat
nung tatakman ra man ing kabyayang mayap,
siguru aku man a diretsu lakad,
e Na ku tulutang karing suksuk dalpak.
-30-

"sumangid ning lumbe"

pipi ing gaga ku balugbug ning banwa
uling katelu ku king nanumang grasya;
king angga man ngeni magumpisa kan'ta,
dalit yang maluka, king pusu, ing dar'la:

mekad i tata ku tau yang e mayap
inya pin kekami mebawi yang agad,
uling nung mayap ya, ikeng mangarawak,
inya nung e mamun iyang mipahamak.

pilit mekuntentu king babye ning kalma
agyang maymut ya pang kalupa ning sadya,
agyang meragul ku a dimut king tula,
-mamasa ku king Dios pulisan na ku lwa.

"igutan me kanu inawa"

kanaku, o tula, ngening mebating ka,
ing pusung tronu mu, ngeni ulila ya,
anti waring paleng minuli na'ng apa
-ing darak ding babi 'ya na'ng kalupa na.

sana kakung tula malyari meng tayran
-ilawut me kaku ing anging manyaman
uling malale neng mumuli king tabang,
mebating ya yumung alang kapamunan

uling king sarili 'la kung akarapat
-ala kung matulid a keya manyabat
-buri ku ume ne kambe ning pamalak
lakwan na ku lande, karin, makakasat.

-30-

"keka, O Eba"

agyang e ka mawad respetu kanaku,
ibat king pusu ku, iti atanggap mu,
uling king sarili anti kung respetu
ing ibye ing dakeng dapat karing tau...

isipan ku, ika, e mu balu mekad,
king kanakung pusu pane kung mangubat,
king biru ning kalma, layun mung magdinat
neng ingitan mu ku king legwan ning labwad.

karing al'wang tau makananung masa?
-manaya ka waring irespetu ra ka
nung pagkaymut mung 'bye ing para karela
neng anting bitin kang magbito king sanga...

"ing katlu ra"

ala kung pagsisyang binye ku ing sabla
pelalung ing bage a sana ali pa,
dapot ukulan ku a e ta na adwa
uling nung ala ka, anti ku'ng kapitna...

ikang kabangal ku, akung kapitna mu
king pangatau ta bilang metung tau;
aku'yng alikabuk, ika ing tagyang ku;
king metung tang adwa, pikwanan king katlu.

king kayap ning labwad, ing tenam mamunga;
mitabi ing langi king lisik Nang grasya,
suli a sisirut, king pamanyagul na,
itas na la naman ding gamat na banwa.

-30-

"e bisang mibalik king panga-anak"

mekad mabating man ing kakung panandam
e ka magtas swala anting kaku galang
dapot e ku buri a kaku mu takman
e na ka sikasu ning kekang pak'sabyan...

inya king lakad ku e murin sa dasnan
ing pamaging-anak pasibayung ayan
ban e ke dinata't basan ing pagkeran
pota ing tyaga mu kanakung agisan...

ika, agyu mu kung pagtyagang lingunan
dapot marine ku king kakung manuyang
uling ing oras mu, king e ku seseryan,
king kekang pamilya kanakung asamsam...

-30-

"ding sisimba"

ating mipalsinta ring mebengi misan
at mipadalan la king tulid pisamban,
kinusad ya ing dyip malawus tinuknang
-mitagun la pala king oras pamaglwal;

ngarang mipagkwentu, "reng sisimbang abak
halus pamilya la, pengari at anak,
dapot ding sisimba neng medyu disoras
misan ding menyaman balate king papag;

"deng neng ganingaldo, ding matwa't debotu,
mangakaba malan atin la pang belu,
dapot ding neng bengi, (dakal) ding mitau
-misan ing homili e re man sikasu..."

-30-

"mitapus pin"

ay! e ka mamalis istung bengi, ngara,
uling tatapus mu at yugse ing grasya
(dapot ing katutwan, uling malinis na,
uling melingun na nanding masala pa).

wa! kan'tang ala pang koryenti king labwad,
mapula la'ng sulu a laru ing tangab,
inya maranun lang matudutud deng anak;
kaybat ning orasyun paynawa nong agad...

'nya nung mamalis ka anti mung tatapus
ing grasya ning Guinu a keka mibubud
-sung ing alikabuk karelang asingut
manguku la't sakit... -bulsa me'yng mabusbus.
-30-

"ing tutu na nita"

ay! e ka magkanta istung maglutu ka,
uling e masanting at e mayap, ngara,
pota ing kalma mu magmaymut ya keka
-e na 'tulut keka ing pamakyasawa!

ninu karing doktor king panaun tamu
ing matul king usuk ding minunang tau,
kan'tang panaun dang ala la pang libru
a magpakilala king usuk ning Guinu?

e wari ing tutu, mayasuk ya'yng kalang,
at iti e mayap a kekang sangapan,
ing kapaldanan mu ban e mu ayabwang
-ing marap king altar, pota e mu dasnan?

-30-

"ing makitid mu pamisip"

nung ing panimanman ning metung a tau
datak ya darasnan, anti yamung batu,
manawa yang lumbug king kababong basu
- bale yang mabule king labul ning bagyu;

ing agyung tabakan ning purosung pusu
ring sangang malati a mengabaldug mu,
ala yang keliwan king mapulang sulu,
ditak ya aktangan ing sala king yatu;

anti yamung tau kilub ning talaga,
ing banwang akakit mabilug yang sala,
dapot nung lumwal ya 'tsaka ya talanga
-kalwalas na pala gewa ning Bathala!

-30-

"ating para keya"

"count your blessings," ngara, at pasalamat ka,
pelalung king simpling angin a inawa,
uling atin tau, mag-"respirator" la
ban kan'ta e yamu mamun ing kaladwa...

...king bye kung milabas, ing agaganaka,
king kaymut ning kalma mepayus ku gaga,
mapang e naku mu linto keng masala
nung ing kuyug ku mu, ding masalpak kung lwa.

nan' waring atin ku nun'e mu kabud bye,
ala kung pibandyan, obrang masalese,
siguru ing grasya, kanaku e bage...
-dapot mamasa kung atin Yang linele....
-30-

"ding taung lalawe mu king buri rang akit"

dakal mapanatu , babye komentaryu
king pipagalan da ring aliwang tau,
nung maglalawe la bala mu nung ninu,
-ilang gutut isip... nung pakalawen mu:

mengari keng dagat ing ka-tangkeng are
(a silapong ibat king mebayung pale)
nu king keyang palad tepus ne king lele,
malagwa neng akit ning taung lalawe,

dapot ing ninuman a bisang mangangas
manakit king tuneng legwan na ning dagat
dapat yang sumisid nung nu la ring perlas
pablasang king bambang ing dakal mu... -dinat.

-30-

"ding asan king dagat"

dakal la ring asan a atyu king dagat,
alben mong magsaya, alben mong maglundag,
dakal la kareti ring seryang payrakap
-mayayamuyut la king sala ning lambat...

ing Guinu ning dagat 'gyang managwanta Ya
durugang ing buyun king kasbu karela
uling ing manasan ing pekalambat na
ring bagya mu pampan king maypis a tela,

dapot ding meligo anting e ra buri
ing magbalik dagat ban ulyan ing Ari,
e ra yata balung banda king tatawli
ing miyatyang lambat dala no king api?
-30-

"anti yang manuk"

kauli king bale darla pa ing pagal
malawus i Eba kalingwan keng uman
kalub king bubungan ing munang komustan
nung ding kakung sese bat da nong pekanan.

ing bunsung nandin pa maglambis kandungan,
ditak mang pinandit e apanusignan
uling ding gamat ku atin lang tatalnan,
pakikisabyan ku at apis-apisan.

dakal simpling bage ring alalagpasan
pablasang king manuk ala kung keliwan,
ing inge ning sabung pipi keng kulungan
a kakabat kaku king daklat ning tatang.

-30-

"agyang metung mu sana"

lalon ke i aku king arap salamin,
mantun ku kanaku nung ating masanting
-mayap a talentu 'gyang metung mung butil
mamasang manakit sakali man atin,

uling isipan ku atin kung talentu
-e ku bisang maming metung kung kalulu
uling king sarili agyang makananu
metung mu man bini mipagkaluban ku:

nung atin kung bini atin kung itanam,
ating aparagul a anting tanaman
king babo ning gabung kakung daralpakan
ating kung tanamang malyaring ukyatan.

-30-

"ing sinturun para king keyang asawa"

ing saling sinturun nanan mu pang daptan
ban kekang isulud king kekang awakan?
-sabage... lalu kang manyilad a legwan,
lalu kang sumanting pag'masdan katawan;

mengari king gamat a ating pulsera
o king taliri mung ating singsing mana,
nung ing awakan mu magsinturun ya pa,
agyang pang i Venus e milele keka...

ika ing bugtung ku a dapat babatan
inya ring gamat ku keka lang tanggapan,
tegulaling ku la a ika mung kawlan
-pamabat ko keka kakung kaluguran.

-30-

"e na pautang a lub"

kaku bilang tatang a keka linugud,

tandanan mu anak, ala kang utang lub,
king lub ku ing sabla depatan kung laus
uling anak da ka a kalam na ning Dios...

akung kabayu mu kanitang anak ka,
agyang mapagal ku makyalung ku keka...
lukut ku man atyan, bala mu mitmu ya
'nya nung sumubu ku ika napang muna...

ing binye kung lugud e ku pepautang,
iti kaswelu na ning pusu ning tatang...
-basta neng bayu ka ume king pagkeran
pakitungge mu ku lagyu king Linalang...

-30-

"mekad tatalbug ya burak"

king metung a balag nung ing kekang akit
kamumuran na pa mutmu neng kalumpis,
at istung tikman me asne king kapait,
nanu ya mong bunga ing lungub king isip...?.

o nung ring akit mu mamu lang lelangan
libutad marangle karin papastulan
nu sagiwang dikut ing paninintunan,
-e ka magkamali king kekang isipan...

nung ing kekang ukul mengasna yang dinat
king mapangumbira a klasi ning gayak
itang misususlud e marayu mekad
serya yang magdinat o tatalbug burak.

-30-

"ing sabungeru"

manyawad yang pera ing gagagang anak,

ing dinwang ning tata amanung masalpak,

inyang sinawa ne king kakagulisak

gulis ning taiktik ing pigpa king balat.

sinaynsing ya'y Eba uling 'la yang tamban,

ala yang asese at 'yapag king dulang,

"ding busbus mung palad," ngana keyang Adan,

"king bulsang baliktad ilang maging sangkan!"

mangaga ya'yng bunsung makabili papag,

dapot ala nemang apanarung gatas.

-makananung atin? memin lang mebalag
karin king bularit kabang gugulisak.

-30-

"ing makarate"

biklat ke ing baul -ing baul tang luma,
ing angin ning napun, kaku sinagana,
tikman keng kakadwa ing mumunang uma,
bista man laun ne 'ne pang kasagiwa...

kipkap ko ring gulis king kanakung kanwan,
ing kayanakan ta anti pa'ng kapilan,
kaku migbalik nga't misalaing timan
kabang pag'masdan ku ing mamu mung legwan;

kaybat siningap ku -malalam a singap,
biklat ko ring mata king matimid a pyak,
at karing gamat ku dimdam da ka gamat
kabang manangis ka king lele kung papag.

-30-

"laus pusung pamagpakamate"

king babo lamesa, king lele ning sartin
ating kambubulag a dinugpa nandin;
menakit yang tagan sigarilyu karin,
dimput ne't silapo, linwal ne king hardin,

at bildug ne iti king inawung kulkul,
at kala-kalale timbunan neng gabun
(anti kang menakit tau a magmalun
king tulid nang puntud ning kuyug nang memun);

at nganang misulat king biniling batu,
"keni makakasat ing metung minutu
nu king sarili na leko nang maswelu
king peparam nang bye king tau ning Guinu."

-30-

"ing matwa king caregiver"

alwa la ugaling senayan ding anak
keni king labwad da rening kule gatas;
bala mu paud ya a mabayat ibwat
ing metung pengaring miras na king edad...

ing tula ning lub ku ane kalyap dakpan
king apat nang dalig ning bale ampunan...
-'tin naku man ditak pensyung tatanggapan
a miguyud kaku nung takbang ku king lwal...

sabyan mu na kako, ing metung balawe,
king kayanakan na timawa yang mebye,
na'ng panamdaman na nung ngening matwa ne
lako me kalayan at king hawla me ike?

-30-

"ding aliwang Eba"

ding aliwang Eba, na'n ku mang isipan,

mababa la lawe karing anggang Adan

'nya karing pakpak da seryang yayapusan

detang patipating mababa mu sawang!?

ding pamangle bulig ila ring panapan,

pibala-balandra ban dang atakiran

-isipan da galang laganas a Adan

hilig dong titima ding sagiwang asan?

king ukul ku ngaku, "pota ila galang

ring manipun dutung para king telaksan,

panyatang ning aldo ban e kaulatan

panangab king kalang nung nu ro dulukan?"

-30-

"kasal"

metung mu man aldo e ku pepaynawa,
latis-latisan ke kilub pepabanwa,
uling talindo ke king kanakung sinta,
ibye ne kanaku ing mayumu nang "wa."

at inyang ikit nang seryosu ku keya,
binulus ne ing "wa" ibat king pusu na
inya angga ngeni manibat kanita
ing pamitau mi migit apat banwa.

ngeni ing panayan, ing tangu ning Banwa
-ing banal a kuldun ban kan'ta kuldas ya,
panaling sagradu, ing Dios pamuklud na
karing taung bisang mamuung pamilya..
-30-

"salamin"

atin mang kasebyang ing libru e dapat
hatulan me iti king uli ning balat,
dapot king ikit kung tau nanding abak,
mekad pamaryus me -e raka ayawat:

nanan ke mang lawen, makasnuk ya tikas,
ken pa'ng talakad na, mikamas kang agad;
nung magsalita ya, ing dila 'ne talas...
-e man mu mamili na'ng amanung 'yagkas.

anti yang payatu a manintun pansin,
bagyu ya a bubyung king kasikan angin,
-e ku misukmama, diklut ke'yng istepin,
inyang bugan ku ne, mispak ya'yng salamin.

-30-

"ing bak byuti" (the back beauty)

menakit kung metung babaing malagu,
ing matuling nang buak makaba yang tutu,
malyaring panali ampong gawan silu
ban king kekang salu dakpan naka pusu...

uling nung akit me, sobra naka selan
nung misdingan mu pa itang keyang leguan;
makagulut ya pa' diosa ne larawan,
mekad nung marap ya lalu kang mangasdan.

dapot ining kalma tutung mapamiru,
inyang minarap ya kinabag ku salu,
e mekapangilag at e ku miruku,
ngakung bulung-bulung, "gumulut naka mu!"

-30-

'laurel"

metung patipating mibalik king daung,
at king keyang tuktuk magdala yang bulung
metung katunayan ning mayap a gabun
nung nu memala na ing albug ning danum.

mengari king bulung* king buntuk ning poeta,
iti korona yang keya pakilala,
uli ning lugud na king literatura
at amanung sisuan, iti, patutu ya.

nung lawen me iti lelang ya king tansu,
iti salamin ne ning laurel a gintu,
poesyang bulung** na, korona king pusu
pakilalang tenak ning poetang tutu.

-30-

*bulung a atin kayabe tangke
**bulung ya mu kabud

"bilang asyas"

"panupaya yu ku, e ra ko atukyan
mamaligtad boti kabang magkantahan...
-sabadu ta ngeni't karening seluran,
ding manaya kaku ban e mangaynipan.

"mamin ku ma't ali, kapad ku mu rin yan
dapot makanyanman, kakung pangilagan,
pota king tula ku e aganaka man
ding sangkan ning pagal ning kakung katawan.

"...manibat king sulu angga karing kalam
nu kenu ku utang ing awus a tatang
-tilutan ning Guinu'ng kaku la misandal
inya bilang asyas e ku mamaglimbang."
-30-

"pamipasalamat"

bista man ing doktor e naku pa timpa,
kitmu ke ing kwartu king matni kung s'wala:
ninung makibalung ing kanakaung "uwa"
pamipasalamat king Suging Bathala?

katila ning k'yak da ring matang alang l'wa
kan'ta ra ku binye king kanakung ima,
agyang e ku balu nung nanu ing uma,
king salu kinatuk ing milalung tula.

inyang kabait ku puru pamu s'wala,
aldo ing milabas inyang akit ke'y 'ma,
at pasalamat ku king Guinung minuma
karing kakung mata ban kumbirang sala.
-30-

"e ku bisang tuknang"

ing kanakung pusu lulanan yang tinta
nung nu ke titiltil ing kanakung pluma
neng misusunis kung bersu ding poesia
ban makasuyu ku king amanung sinta.

ditak na la'ng tutung mahilig magrima
dakal la kareti ding pepaynawa na
ding al'wa uli na ning lekarang banwa,
ding al'wa ing sangkan, mipda nang imbut da.

magastus, mapagal ing maging poeta
misan ding aliwa pagsisti ra ka pa
dapot nung paklyan ke ing kanakung pluma,
mabawas kapatak kapampangang tinta.

-30-

"papa-pu la pa"

itang tugak batan a kaluguran ta,
kauli na keti ibat amerika,
dit mang kapampangan e ne yata b'yasa,
-inyang kasabi ke, inglis-inglis ya pa.

ketang inayan ke keta king karela
ban mipagmananu at mipangomusta,
ing keyang pekibat, "ridit, ridit," ngana,
itang "kokak, kokak," akalingwan na na.

e ra mo kalupa ring anak nang saba
a mengasapwak ngan karin king canada,
neng kasabi mu la mangasalusu la
neng mangapampangan at papa-"pu" la pa.

-30-

"yata ning aldo"

ginulis ne korti ing bunduk Arayat,
king koronang gintu a binang katindag,
kaybat ining Helios bagya yang pepaytas
king mabilug labwad ityat no ring gamat;

king malating busbus ning kekaming dalig
linsut ya taliri anting tingting palis,
tinimid king lande makapatalilis,
anti yang larawan'g king lona* ginulis.

kaybat ning pinandit ding rosas king hardin
tigkil na la pisngi, tiniman lang tambing,
lidlad do ring palad kaybat menalangin,
sepu ra ing mana'ng kukuldas king angin.

-30-
korti - silhouette
lona - canvas

"ing indung ibatan"

kan'tang mura ya tyup ing anging amihan,
karing keyang ilug karin ya magbatwan,
ding malinong sibul, at berding kakewan,
kalam lang tinggap na king Talapaglalang.

dakal nong dayuhan ding keya tinuklu,
achilles nang anak, e ro apasuku;
inyang manabwang ya itang pinatubu,
e ro apa-urung, e anti ring kanu.

migit ya king "pompeii," kaybat mitambunan,
manibat king pisak siniro yang myuman
uling mengari yang butul a mitanam,
mitmu yang pangaku ampong kapanayan.

-30-

"sentimyentu"

kekami, 'tin adwang matwang miyasawa,
e m'yabe pagkeran king pamanudtud da,
uling ing babai ing pangilagan na
pota ing kabislak turan ne rayuma.

dapot ing lalaki lihim yang mangaga
panyatang ning bengi kabang makakera,
e kimut ning tud na ing paragus king lua
nun'e itang subyang a pamangulila.

"kan'tang anak kaming matibe king dimla
e ku mipatudtud nung e kakawlan na,
-ngening timbud kami pesari na ning tua,
ding kawul na kaku karin kinawang la." -30-

"e re buri gatas"

ing gatas damulag para king damulag,
kalupa keng babi karing keyang bigak;
mengari keng indu karing keyang anak,
makisagum lugud at lingap ya gatas.

aganaka ko pin detang kilala ku
purung kapampangan ding tata at indu
dapot neng kasabi ring anak dang atlu,
tagalug at inglis ing yapseng amanu.

siguru misnuk la king amanung sisuan;
e re buri gatas ing indung ibatan
inya reng anak da e ra la tirwanan
makapagsalita dit mang kapampangan.

-30-

"ing peninapan"

king ditak mung oras bisa ku sa'ng mandam
ban istorya keka itang peninapan
uling king pamisip e bisang kumawang;
anting paganaka ban e makalingwan...

manangis yang linub ing indu king tudtud,
migsubsub king labwad king kasukal nang lub,
ngana, "ding anak ku mengari lang misnuk
king kanakung gatas a Dios ing migkalub...

nung sumusu la mu kaswelu ku sana
uling karing takde akawul ku la pa
lalu't e naku man aliwa karela
uli rugung akung Indung ibatan ra.

-30-

"napakatagalog o kakapampangan?"

ing magmanehung dyip nganang menagalug,
"sali po natin s'ya, konti pa pong dusug."
nga'ring estudyanti, "maplas sa balugbug!"
at sinagakgak la, meyling atuk-atuk.

"napakatagalog naman yata kuya?"
ngara pang sinabi, "e ba usug ita?"
-minatba ya'ng metung, betabatan na la,
"patugut na kayu, makarine," ngana.

napakatagalog o kakapampangan:
insanu kareta ing dapat tang kalyan;
kapampangang kimo king amanung sisuan
o ing king tagalug ing ing kimong megaral?

-30-

"amanung sugi"

‘tin magsabisabi, inyang mimasmas ya
kitnan ke nung nanu ing pemanyabi na,
ing keyang pekibat, “eku balu,” ngana,
pablasang amanung angel kanu ita…

-alang kabaldugan king angel man iti
nung e mu aintindyan ing kekang sinabi
dapot ing amanung sisuan ku ing sugi
uling amanu ne ning Dios tamung Ari:

iti ing amanung ginamit Na kaku
king banal a biblya ‘nyang usukan naku,
at ya ing yagkas ku neng manalangin ku
at makisabi ku king Mal tamung Guinu.

-30-

"ing kasal"

alang karing Ebang katolikung tune
ing e managimpan a maputi trahe
ban papuntang altar ilakad na niti
kayabe ning keyang apiling lalaki.

lalaki kung al’wa karing kerakalan
matas paglalawe king h’wes a kasalan,
ing maulaga mu e ya mirusinganulingan
uling ing kasal h’wes, king Dios agpang neman.

ing kasal ning pari nanung ulaga na
nung kaybat na nita salawlan d’ya pala
map ya pa ing king h’wes (ingatan ya sana,
king mata ning Guinu maki-ulaga ya.)
-30-

"malapit ne mu"

limbug na ing sala karing kakung mata,
karing balugbug ku mitda no ring nota,
mekad e malawut ing anging marimla
agkat na neng mamun ing kakung inawa;

nung itang "elixir" kanaku mung ikit
sana ring kanwan ta ala lang kalumpis,
atabi ke sana ing kaku darakit
ban ayan ding lande ring marimlang dalig;

ngening atyu na la ring aldong matabang
magbalik la yumu karing kekang talan
uling ing lugud mu ibat kayanakan,
king talik mu talan kakung daramdaman.
-30-

"dai nang payalbug"

parnasu, parnasu, parnasu, parnasu,
o’t maklak ne yata ing katni mu tronu?
e ne miyuyunyat punta ing pluma mu,
kareng waring musa e ne inspiradu?

misan ing kilabut, kanaku linukub
mabilug katawan, bitis angga buntuk,
king amanung dindam ding adwang balugbug,
ding poeta kanu, “dai nong payalbug.”

detang atin tyaga king pamamalangkas
karing kawatasang makirima’t sukad
pablasang dit no mu karing talasulat
anti ring babasang kalupa rang ditak.

-30-

*** gewa ke pu ining poesiang ini agpang king midalakit a istorya kanaku, iti ya itang inyang manyawad lang saup king metung a meyor ding atlung laureadung poeta ban apatindayag de king kapamilatan na ning radyu ing amanung sisuan, at tengwanan na la ning alkalde a nganang mekibat, "ayasahan yu kung sumaup uling balu ku poets are the vanishing breed." (mas o menus ita pu ing atatandanan ku king istorya.)